Mat 27 | ZomZIV | STEP | Zingsang tungin siampi ma-kaite le mipite’ upate khempeuh in Jesu, thah dingin a khensat uh hi.

rPs 69:21

Matthew 27

Judas Gui-awk

1 Zingsang tungin siampi ma-kaite le mipite’ upate khempeuh in Jesu, thah dingin a khensat uh hi. 2 Amaute in amah henin paikhiatpih uh a, ukpipa Pilate khutah a pia uh hi. ^a

3 Amah lehhekpa Judas in Jesu a kimawhpaih lam a muh ciangin mawh kisa in dah lua ahi manin siampi makaite le upate kiangah ngun tang sawmthum va pia kik-a, 4 “Ka mawh zo hi; mawhpeng sisan ka lehhek zo hi,” a ci hi.

Amaute in, “Tua leh ko bang kisai ahi hiam? Tua pen nangma thu hi hen,” ci-in a dawng uh hi.

5 Tua ciangin Judas in a sumte biakinnpi sungah lawnin a paisan hi. Tua khit ciangin amah paikhia a, amah le amah a gui-awk hi.

6 Siampite in sumtangte tawm uh a, “Hih sum sisan man ahi manin sumkholna sunga koih ding thukham tawh kilehbulh hi,” a ci uh hi. 7 Tua ahi ciangin amaute in tua sum, gamdang mite kivuina mun dingin belseekpa lo leina-a zat dingin a khensat uh hi. 8 Tua hangin tua mun, tuni dong Sisan Lo, kici hi. 9 Tua hunin, kamsangpa Jeremiah gensa: “Israel mipite in ama man ding a ciangtansa bangin, amaute in sumtang sawmthum la uh a, 10 Topa in kei hong thupiak bangin bellei lakna mun lei nadingin tua sumte a zang uh hi,” ^{▼▼27.10 Zec. 11:12, 13 le Jer.19:1-13;32:6-9} cih thu a tangtung hi. ^c

Pilate Mai ah Jesu

11 Tua hun laitakin ukpipa mai-ah Jesu a ding hi. Ukpipa in ama kiangah, “Nang Jew-te kumpipa na hi hiam?” ci-in a dong hi. ^d

Jesu in, “Hi mah hi, na cih bangin ka hi hi,” ci-in a dawng hi.

12 Siampi makaite le upate in amah a mawhsak uh ciangin amah in a dawng kik kei hi. 13 Tua ciangin Pilate in, “Amaute in nang langa a teci pannate uh za lo na hi hiam?” ci-in a dong hi. 14 Ahi hangin Jesu in dawng lo a, amau mawhmatnate khat beek nangawn a dawng kik peuhmah kei hi. Tua pen ukpipa in lamdang a sa mahmah hi. ^e

15 Tua lai-in Pawi kibawl hunin mipite teel thongkia khat ta khahkhiat ding, ukpipa ngeina ahi hi. 16 Tua laitakin Barabbas kici a gilo-a minthang thongkia khat a om hi. 17 Tua ahi ciangin mihonpite a kikhop uh ciangin Pilate in amaute kiangah, “Barabbas le Christ kici Jesu kua zaw khah leng na deih uh hiam?” ci-in a dong hi. 18 Ahang in, amaute in Jesu a hazat manun ama khutah pia uh ahilam a thei hi. ^f

19 Pilate a thukhenna tokhom ah a tut laitakin a zi in, “Tua mawhpengpa bangmah na cih kha kei in; ama hangin tuni-in ka mangin tampitak ka thuak hi,” ci-in thu a khak hi. ^g

20 Ahi hangin in, Barabbas khaha, Jesu thah dinga a nget nadingun siampi makaite le upate in mihonpite a thuzawh uh hi. ^h

21 Ukpipa in, “Kua zaw hong khahkhia leng na deih uh hiam?” ci-in a dong hi.

Amaute in, “Barabbas,” a ci uh hi.

22 Pilate in, “Tua ahileh Christ kici Jesu bang ka cih ding hiam?” ci-in a dong hi.

Amaute in a vekpi un, “Amah kilhlum in!” ci-in a dawng uh hi.

23 Pilate in, “Bang hang in? Amah’n bang tatkhialhna nei ahi hiam?” ci-in a dong hi.

Ahi hangin amaute in, “Amah kilhlum in,” ci-in a ngaihzaw-in a kiko uh hi.

24 Pilate in a cih nading thei lo tham loin mipite so dinga kipan a muh ciangin tui la-in mihonpite mai-ah a khut sil-a, “Hih pa sisan tawh kisai-in ka mawhpeng hi. Nomau thuthu hi ta hen,” a ci hi. ⁱ

25 Mipite khempeuh in, “Ama sisan kote tung le ka suan ka khakte uh tungah tu ta hen!” ci-in a dawng uh hi. ^j

26 Tua ciangin amaute kiangah Barabbas a khahkhia hi. Ahi hangin Jesu a satsak khit ciangin kilhlup dingin amaute khutah a pia hi. ^k

Galkapte in Jesu Zahko

27 Tua ciangin ukpipa galkapte in ukpipa innpi ah Jesu paipih uh a, galkap company buppi a kimah a umcihsak uh hi. 28 Amaute in Jesu puan hawkkhiatsakin kumpi puan dupsan khat silhsak uh a, 29 ling tawh kumpi lukhu khat phanin a lutungah a khusak uh hi. A taklam khutah ciangkhut khat tawisak uh a, a mai-ah khukdinin, “Jew-te kumpipa aw, khansawt in,” ci-in a zahko uh hi. 30 Amah cilphihin, a ciangkhut la kik uh a, a lutang a satsat mai uh hi. 31 Amah a zahko khit uh ciangin a kumpi puan suahkhiat sak uh a, ama puan a silhsak kik uh hi. Tua khit ciangin kilhlup dingin amah a paikhiatpih uh hi. ^l

Kilhlupna

32 Amaute a paikhiat laitakun Simon kici Cyrene pana mi khat tuak uh a, zawhthawh thu-in singlamteh a puasak uh hi. 33 Amaute Golgotha (Luguh mun cihna) kici mun a tung uh hi. 34 Tua lai-ah a khaa tawh kihel lenggahzu a pia uh hi. Ahi hangin a ciap ciangin a dawn nuam kei hi. 35 Singlamteh tungah Jesu a kilh khit uh ciangin amaute in ai sanin ^{▼▼27.35 Khutgelh nunung tawmkhatah kamsangte genkholhna,”Amaute in ka puante amau lakah a hawm nadingun ai a san uh hi,’ cih thu a tangtun nadingin ai a san uh hi. (Ph. 22:18)} ama puan a hawm uh hi. 36 Tua ciangin amaute tu-in amah a vil uh hi. 37 Amaute in: HIH JEW-TE KUMPIPA, JESU HI, ci-in a mawhmatna uh lai, a lutung sanah a suang uh hi. 38 Misuamte nih a taklam khat, a veilam khat, singlamteh ah a kilh uh hi. 39 Tua lai a tawnte in amah engko uh a lupeisanin, 40 “Biakinnpi susia-a ni thum sunga lam kik zo ding pa aw, nang le nang kihonkhia in! Pasian Tapa na hileh singlamteh tung pan hong kumsuk in!” a ci uh hi. ⁿ

41 Tua mah bangin siampi makaite, thukham siate le upate in amah a zahko uh hi. 42 Amaute in, “Amah in midangte honkhia zo napi, amah le amah kihonkhia zo lo pi! Amah Israel-te kumpipa hi ven! Tu laitakin singlamteh tung pan hong kumsuk leh amah um ni. 43 Amah’n Pasian a muang hi. ‘Pasian Tapa ka hi;’ a cih buangin Pasian in a ut leh amah tu-in hon ta hen,” a ci uh hi. 44 Tua mah bangin amah tawh kikhai khawm misuamte in zong a eng koko uh hi.

Jesu Sihna

45 Tua gam bupah nai gukna-a kipan nai kuana dong khim a zing hi. 46 Nai kua hun pawlin Jesu in, “Eloi, Eloi, ^{▼▼27.46 Khutgelh pawlkhatah Eli, Eli} lama sabachthani?” ci-in nakpi in a kiko hi. A khiatna, “Ka Pasian, ka Paisan aw, bang hangin kei hong paisan na hi hiam?” ^{▼▼27.46 Ph. 21:1} cihna ahi hi. ^q

47 Tua lai-a ding mi pawlkhat in hih a cih a zak uh ciangin, “Amah’n Elijah sam hi,” a ci uh hi.

48 Tua khit phetin amaute lakah khat va tai a tuihup a va la hi. Lenggahzu thuk sungah tuihup a diah khit ciangin, ciang dawnah koihin Jesu dawn dingin a pia hi. 49 Ahi hangin adangte in, “Bangmah cih dah dih in; amah honkhia dingin Elijah hong pai hiam en phot dih ni,” a ci uh hi. ^r

50 Jesu nakpi in a kiko khit ciangin a kha a khah hi. ^s

51 Tua hun lianin biakinnpi puanzak alu pan ataw dong kikekin phel nih a suak hi. Lei kilokin suangtumpite kitamkham hi. 52 Hante kihonga, a sisa misiangthote luang tampi hing kikin a tho hi. 53 Amaute han panin pusuakkhia uh a, Jesu thawhkik khit ciangin khuapi siangtho sungah pai-in mi tampi kiangah a kilang uh hi.

54 Jesu luang a cingte le zakhat-ukpa in, zinling le thupiang teng a muh uh ciangin lau mahmah uh a, “Pasian Tapa ^{▼▼27.54 Ahikeh tapa khat} lah a hi takpi a!” a ci uh hi. ^u

55 A gamla sim pana a galvil numei tampi tua lai-ah a om uh hi. Amaute, Jesu kisapnate a hihsak dingin Galilee pana amah a zuite ahi uh hi. 56 Tuate lakah Mary Magdalene, James le Joseph-te nu Mary le Zebedee tate’ nu a om uh hi. ^v

Jesu Kivuina

57 Nitak lam ciangin Jesu nungzui a suak khin Joseph min nei mihau khat Arimathea panin va pai hi. 58 Amah Pilate kiangah pai-a Jesu luang a nget ciangin, amah piak dingin Pilate in thu a pia hi. 59 Joseph in siluang la a, saihadial puan siangtho-in a tun khit ciangin, 60 amah mah in suangpi a khuak han thak sungah a sial hi. Tua han kongvang suangtumpi khatin a huk khit ciangin a paikhia hi. 61 Mary Magdalene le Mary dang khat han galsan takah a tu uh hi.

Hanah A Cingpa

62 Kiginkholh Ni khit a zingciang in Pilate kiangah siampi makaite le Pharisee-te a pai uh hi. 63 Amaute in, “Pu aw, tua mikhempa in a nuntak lai-in, ni thum khit ciangin ka tho kik ding hi,’ a cih ka phawk gige uh hi. 64 Tua ahi ciangin a ni thum ni dong tua han, bangmah a kicih loh nadingin thu pia in. Tua hi kei leh a nungzuite pai-in a luang gu ding uh a, amah misi pan tho zo hi, ci-in mite kiangah gen kha ding uh hi. Tua hileh hong khem masak sangin hong khem nunung a nasiazaw lai ding hi,” a ci uh hi. ^w

65 Pilate in, “A cing mi khat paipih un. Pai unla na theih bangun tua han a muanhuai theithei dingin na bawl un,” a ci hi. 66 Tua ciangin amaute pai uh a, han kongvang khakna suang tungah seal in ciamteh uh a, a bit nadingin a cingsak uh hi.